–
Minamasdan kita,
Binibilang ang iyong paghinga,
Anghel kang aking nakikita,
Puso ko ay umaapaw sa tuwa…
–
Labi mong mamula-mula,
Parang iginuhit ng pluma,
Kayumanggi at makinis mong kutis,
Haplusin, damhin, ito ang aking nais…
–
Kinurot ang sarili, nais magising,
Panaginip lang ba na ika’y kapiling?
Hinayaang mga kaluluwa ay magsanib,
Sa lalim ng gabi, dinig ko ang iyong dibdib…
–
Pangarap na kay-ilap,
Ngayon ay nasa aking harap,
Parang ayaw ko nang kumurap,
Baka ika’y biglang sumama sa ulap….